<b> Hiray sehatra sy hiray fo ho an’ny ankizy sahirana. Hiompana amin’izay ilay fampisehoana iarahan’i Samoëla sy ny tarika Mikea. Mba samy ho velon-tsiky mandritra ny fety...
«Mazoto foana Samoëla rehefa zavatra misy dikany no hatao», hoy i Samoëla. «Efa nanapa-kevitra ny tsy hanao cabaret intsony aho, saingy hafa ity satria hafa izany hanampy ny sahirana izany», hoy kosa i Théo Rakotovao, lehiben’ny tarika Mikea. Hifampizara sehatra ny tarika roa, mandritra ilay hetsika hotontosaina ny alarobia 23 desambra izao amin’ny 9 ora alina, eny amin’ny Carlton Madagascar. Fantatra mantsy fa hatokana manontolo hampifaliana ireo ankizy sahirana manerana ireo boriborintany enina eto an-drenivohitra ny tombony rehetra azo amin’ny seho.
«Omeo tsiky izy ireo» no teny fanentanana nataon’ny K.Deal Events, mpikarakara ny hetsika. Ny 24 desambra mantsy no hizarana ny kilalao ho an’ireo ankizy 500 eo ho eo, isaky ny boriborintany. Hiainga eny amin’ny Citic Behoririka ny filaharambe amin’ny 8 ora sy sasany, ka hitety ireo Epp vitsivitsy.
Tsy hisy fampiaraham-peo
Haka endrika fampisehoana roa samy hafa ny fotoana. Samy hanomana hira 14 avy eo ho eo ny tarika roa amin’io. «Fifaliana ho anay ny hifampizara sehatra. Indrisy fa be ny manahirana ka tsy afaka nanomana hira iarahana izahay», hoy i Théo. Na izany aza, nampanantena izy fa tokony hisy ny fiarahany miasa amin’i Samöela sy ny mpanakanto hafa aoriana kely.
Mialoha izany, hitondra santionany tamin’ireo fampisehoana an-jatony notontosaina nandritra ny fitetezam-pirenena nataony ny Mikea anio amin’ny 7 ora hariva, etsy amin’ny CCAC Analakely.
Zo ny Aina Randriatsiresy
