|
 |
INDRAIM-BAVA |
|
|
INDRAIM-BAVA
Savorovoro tanteraka
|
|
Tanteraka ny fanirian’ny mpivarotra amoron-dalana. Nomena azy ny arabe izay nilainy rehetra eto an-drenivohitra, ny manoloana ny hopitaly Befelatanana mandritra ny herinandro. Faly sy ravo ireo nivoy ny fanoherana ny fandaminana nokasain’ny kaominina hapetraka. Be koa ireo mpamendrofendro tamin’ny gazety sy ny fahitalavitra fa tsy rariny ny mahazo ireo madinika raha afindra eny Namontana Madera. Ny mpanao politika tsy nisy mpihaino intsony ka niandry kendry tohina mba handrehetana ny afo handrodanana izay efa mijoro. Fanjakan’ny madinika tokoa, araka ny tolom-bahoaka tamin’ny mey 1972 nentina nandrodanana ny fanjakana saribakolin’ny mpanjanaka. Lasa lalan-tokana sy tery ny eo Behoririka ka lalana 20 metatra atao ao anatin’ny adiny iray. Ireo mpandeha taxi-be sy ny taxi mihitsoka eo tsy mba olona mitady fivelomana fa ry zareo mpivarotra ampovoan-dalana ihany no mitrongy vao homana. Ry zareo tsy mandoa hetra, mitondra fako sy loto, mahabe ny mpanendaka sy mpanao sinto-mahery indray no avo vava rehefa mahazo fitenenana. Avy nibodo ny toerana ireo mpivarotra dia nilaza fa hiala hono amin’ny 4 janoary rehefa vita ny tsenan’ny Noely. Tonga io fe-potoana io, hanambara indray ny madinika fa avelao amin’ny Paska vao hiala fa asa fivelomana izy ity. Avy eo hidongy eo hatramin’ny fetim-pirenena. Mankalaza ny faha-50 taona nahazoana ny fahaleovantena ve isika dia hifanilika ê! Vokany, tsy hiala eo mandrakizay ary hitombo isan’andro ny isan’ireo mpivarotra tsy ara-dalàna. Aoka tsy himenomenona isika fa mitohana ny fifamoivoizana satria to ny nofin’ny madinika. Mazotoa miantsena ao anaty korontana!
Vonjy Andrianjaka
|
 |
|
|
|
|
|
|
|
|
| Fanadihadiana |
 |
|
|
|
|
| |
|
