|
 |
TRANGA |
|
|
Vokatry ny orambe
Niakatra ny rano, trano roa nirodana
|
|
Mbola haharitra ny orambe mikija eto an-dreniv ohitra sy ny manodidina. Manimba zavatra sahady anefa izany raha vao andro vitsy monja aza. Trano roa no nirodana, teny Besarety sy Ambatomitsangana. Soa ihany mba tsy nisy ny aina nafoy.
Nitohitohy hatrany ny orambe teto an-drenivohitra. Niakatra hatrany ny rano amin’ny faritra maro, hatramin’ny renirano aza, toy ny eny Ikopa sy Sisaony. Tsy misy atahorana aloha ny fiakaran’ny rano amin’ireto farany, araka ny fanazavan’ny tompon’andraikitra mpanara-maso azy ireo. Ny rano amin’ny faritra iva kosa anefa tsy mitsaha-miakatra. Trano iray no nirodana vokatr’izany teny Ambodimanga Besarety, ny zoma hifoha asabotsy lasa teo. Vokatry ny orambe mikija no nampivava ilay trano ka nirodana no niafarany. Soa ihany fa tsy nisy ny aina nafoy tamin’izany loza izany. Maromaro koa ny trano mitriatra amin’izao fotoana izao, izay tokony harahin’ny tompony maso akaiky. Amin’ny fotoan’andro maintany tsy misy orana iny no atahorana hipoaka ny trano.
Ankoatra izay, tapaka ny ankamaroan’ny lalana eto an-drenivohitra rehefa avy be ny orana. «Tsy mbola nahita tompon’andraikitra nijery akaiky ny momba ireo lalana feno rano sy lakan-drano tsetsina izahay hatramin’izao kanefa fotoana tokony hanaovana izany izao », hoy ny tompona fiara iray eny Besarety. Voamariky ny olona fa mbola tsy nandray andraikitra amin’ny fanadiovana ireo lakandrano na fanamboaran-dalana avy hatrany ny ao amin’ny kaominina. Mety noho ny antony teknika koa anefa no tsy hiasan-dry zareo eo noho eo. Miandry ny orana tsy hirotsaka intsony angamba. Andrasana ny fanazavana.
Yves S.
|
 |
|
|
|
|
|
|
|
|
| Fanadihadiana |
 |
|
|
|
|
| |
|
