|
 |
INDRAIM-BAVA |
|
|
INDRAIM-BAVA
Farany vao misy (v)entiny…
|
|
Sotro ranombarin’alika, hono, farany vao misy ventiny. Izany ve izao dinika hamahana ny krizy politika eto Madagasikara any Addis-Abeba, Etiopia, izao ? Samy mirary izany ho famaranana ny raharaha, indrindra ny krizy, ny rehetra. Mba farany vao misy ventiny ! Hiseho ny tena fitiavan-tanindrazana, fahatsiarovan-tena ho tomponandraikitra, fijerena akaiky izay hanamaivanana ny fahoriam-bahoaka, fitsinjovana ny tombontsoa ambonin’ny firenena. Fikasana izany, azo tanterahina. Efa samy nanao izany ho ambentin-kabary ireo ankolafy.
Amin’izao heverina ho dinika farany izao koa vao misy ny entin’ny hambom-pony ny sasany : be fepetra sy haitraitra, tsy mandefitra, mitompo teny fantatra… Hambom-po politika ? Manara-maso akaiky ny vahoaka. Ho hitan’ny havany eo izay diso paika, be fitetika… Na ahoana na ahoana, tsy maintsy miroso ny tantara : izay vita, hono, dia tantara. Na izany aza, tsy azo atao amboletra ny raharaha. Izay no ifampidinihana ! Mba farany vao misy ventiny, fa tsy amin’izao faran’izao vao misy entin’ny hambom-po amin’ny tsy antony.
Ny sotro ranombarin’alika, rey olona, no farany vao misy ventiny. Ny alika koa no miverina amin’ny naloany. Raha misy ny tsy nety tamin’ny dinika teo aloha, aleo tsy hiverenana intsony. Mba izay mampitovy fijery ho amin’ny marimaritra iraisana no ifandroritana, fa tsy izay mampisara-bazana efa fantatra hatramin’izay. Fifampitsinjovana sa fifamotehana no atao ? Mba azo roritina hatrany ny dinika : izay lava dinika, lava rariny. Raha tsy manapa-kevitra hamarana ny raharaha isika, isika no hofaran’ny raharaha amin’ny fahapotehana tanteraka. Mba tsy ho ratsy fiafara tahaka ny vary lany laoka…
Rafaly Nd.
|
 |
|
|
|
|
|
|
|
|
| Fanadihadiana |
 |
|
|
|
|
| |
|
